Чâваш кêнеке издательстви вулакана çулсеренех хитре те хâйнеевêрлê кêнекесемпе савâнтарать: тêрлê енлê вêсем, тêрлê ÿсêмрисем валли. Илемлê литература, вêренÿ кêнекисем, сâмахсарсем, таврапêлÿпе тата тêрлê âслайпа çыхâннисем, паллâ çынсемпе паллаштараканнисем - тем тêрли те пур кâçал кâларма палâртнисем хушшинче. Мêнлерех-ха 2023 çулхи тематика планê - издательствâн тêп редакторê Владимир Степанов вâрттâнлâх чатâрне уçать.
- Владимир Васильевич, мêнпе савâнтарê, тêлêнтерê кâçал Чâваш кêнеке издательстви?
- Кêскен каласа пама та йывâр. Чи малтанах çакна палâртам, издательство планêнче чâвашла, вырâсла тата чâвашла-вырâсла кêнекесем пулêç, ятсене илес пулсан - унчченхи çыравçâсем те, халь пурâнакан авторсем те.
- Тêслêхрен...
- Калâпâр, Михаил Пришвинâн «Вâрман тухтâрê» калавсен пуххи, вâл икê чêлхепе - вырâсла тата чâвашла - пулать. Иван Яковлевâн «Сармантей» юмахê, Галина Матвееван «Çураçми кÿршêсем» сâвâлла юмахê, Роза Шевлепин «Тунсâхпи» юмахê, «Чâваш халâх юмахêсем», «Уяв кâшâлê», «Чêрчунсемпе паллашар» (Ольга Федорова пухса хатêрленê) тата ыттисем те. Вêсем пурте икê чêлхепе пулмалла.
- Кунта ачасем валли кâлараканнисене çеç асâнтâр пек туйâнать. Аслисем валли палâртман-им?
- Паллах, палâртнâ. Тематика планê темиçе пайран тâрать, унта кêçêн çулхи ачасем, вâтам класра вêренекеннисем, аслâ классенче вêренекенсем тата çитêннисем валли уйрâммâн палâртса хуратпâр. Сâмахран, вырâсла Петр Осиповâн «Семья Эльгеевых» (куçаруçисем - З.Ф. Осипова тата З.В. Романова) романêн иккêмêш кêнекине кâларма палâртнâ. Çавâн пекех планра Владимир Левуковâн «Êмêр пêрле пуласчê», Алексей Афанасьевâн «Юманлâх çулçâ тâкмарê» виçê кêнекерен тâракан романêн пêрремêш пайê, Николай Евдокимовâн «Çулсем-йêрсем» романê, Хветêр Уярâн «Çырнисен пуххи» пур. «Алран алла» ярâма тâсса «Сухви сехмечêсем» кêнеке кâларма палâртнâ. Унта тêрлê авторсен - Александр Угольниковâн, Григорий Лучâн, Микиш Павâлêн, Аркадий Êçхêлêн тата ыттисен - калавêсене кêртнê. Тепêр кêнекене те уйрâммâн асâнса хâварас килет, Чâваш Республикин Культура, национальнâçсен тата архив êçêн министерстви пêлтêр драматургсен конкурсне ирттерчê, çав âмâртâва хутшâннâ хâш-пêр авторсен тата çêнтерÿçêсен хайлавêсене кêртсе уйрâммâн кâларса вулакансене çеç мар, районсенчи, ялсенчи халâх театрêсене те парне тâвасшâн..
- Владимир Васильевич, конкурс пирки асâнтâр, Цифра аталанâвêн министерстви те алçырусен конкурсне ирттерет-çке...
- Çапла, Чâваш Республикин Цифра аталанâвêпе информаци политикин тата массâллâ коммуникацисен министерстви ачасемпе çамрâксен алçырâвêсен авторêсем валли çулсерен ятарлâ конкурс ирттерет. Унта çêнтерекенсен êçêсене патшалâх шучêпе кâлараççê, юлашки çулсенче çак мелпе çирêм ытла кêнеке кун çути курчê. Кâçал та пêлтêрхи çêнтерÿçêсен кêнекисем - Николай Ларионовâн «Микки мыскарисем» (кêçêн çулхи ачасем валли çырнâ калавсем кêнê унта), Юрий Исаевâн «Çêнê касâн шухâ ачисем» (вâтам классенче вêренекенсем валли), Сергей Павловâн «Шâпчâк çêрêпех юрлать» романê (аслâ классенче вêренекенсем валли) - вулакан патне çитêç.
- Издательство çамрâк, çêнê авторсем шырас тêлêшпе хастар êçлени савâнтарать. Кâçал унашкал ятсем пур-и?
- Çêнê авторсене тупассине, вêсене çул уçса парассине эпир хамâрâн тêп тивêçсенчен пêри тесе шутлатпâр, хâйне майлâ мисси пекех. Кâçалхи темплана хальлêхе çакнашкал авторсен алçырâвêсене кêртнê: Ирина Кошкинан «Уйâх юлташне шырани», Галина Анисован «Лêпêшпе вêлле хурчê», Константин Малышевâн «Ачалâхâм», Валентина Кириллован «Сас пачê ывâлâм», Надежда Колесникован «Вдали от родины», Нина Царыгинан «Çил-тâманлâ êмêт», Александр Трофимовâн «Тепре куриччен!»... Çавâн пекех çамрâк авторсен калавêсене пухса пêр кêнеке кâларма палâртнâ.
- Эсир кâларакан кêнекесем тêрлê конкурсра мала тухаççê, сумлâ парнесене тивêçеççê. Вêсенчен ытларахâшê - таврапêлÿпе, чâваш халâхêн историйêпе, пултарулâхêпе, Чâваш Енêн паллâ çыннисемпе çыхâннисем. Ку енêпе кâçал мêн-мêн палâртнâ-ши?
- Виталий Ивановâн «Этническая история чувашского народа» истори очеркê халâхâмâрâн кунçулêпе паллаштарê, вâл икê чêлхепе пулê. Надежда Кириллова пирêн паллâ театр ÿнерçи Станислав Кошкин çинчен «Театр - манâн тêнчем, манâн муза» (Театр - мой мир, моя муза) питê ла-йâх алçыру хатêрленê: вâл сâнÿкерчêксемпе, ÿкерчêксемпе пуян. Геннадий Иванов-Орков яланах паха алçырусемпе савâнтарать, унâн тепêр альбом-кêнеки «Образы Чувашии в узорах» ятлâ пулê. Тепêр альбом-кêнеке - «Вера Кузьмина» - «Выдающиеся люди Чувашии» ярâма тâсê, пурте юратакан СССР халâх артистки Вера Кузьминична Кузьмина çуралнâранпа 100 çул çитнине халалласа тухê. Зоя Трифонован «Туристско-экскурсионные маршруты по Чувашии» кêнекисене вулакансем хапâлласа йышâнчêç, кâçал унâн виççêмêш кâларâмê кун çути курмалла, унта Чâваш Енêн вâта тата анат енчи районсенчи илêртÿллê вырâнсем, палâксем, музейсем çинчен çырса кâтартнâ.
- Владимир Васильевич, эсир пêлтêр чâвашла çырнâ романсен конкурсне ирттересси çинчен пêлтернêччê. Çêнтерÿçêне тивêçекен парне – издательство хâйêн шучêпе кêнеке кâларса пани. Апла ку çулталâк вêçнелле вулакансем çêнê роман кêтсе илеççех пулê?
- Конкурс пырать, темиçе алçыру илсе килнê те êнтê авторсем.
- Камсем-ши?
- Конкурс положенийêпе эпир хальлêхе авторсен ячêсене те, мêнле алçырусем тâратнине те калама пултараймастпâр. Çакна çеç калатâп, çыравçâсенчен алçырусем кêтетпêр, конкурса малалла пырать-ха, пêтêмлетÿсем тума иртерех. Эпир ку конкурса ячêшêн пêлтермен-çке, вулакансем питê ыйтаççê çêнê романсем. Çапла, романсем, пысâк калâпâшлâ хайлавсем кêтеççê. Хамâр енчен эпир плана кêртсе хунâ çак кêнекене кâларассине. Çавâнпа та çыравçâсене хастартарах пулма тепêр хут чêнсе калатâп.
- Кêнеке кâларасси вâл производство пекех, унта йâлтах палâртнâ пек пулмасть тепêр чухне... Калâпâр, хâш-пêр алçырâва тêрлê сâлтава пула тепêр çула хâварасси те сиксе тухать, çавâнпа та издательствâн сунтâхêнче ытти алçыру пурах êнтê...
- Паллах, пурах, резерв тени яланах пулнâ. Калâпâр, Юрий Скворцовâн «Пушмак йêрê» повеçсемпе калавсен пуххи, Степан Асланâн «Ахрат» романê... Роман вырâсла пулê. Василий Кервенêн «Хура хурâн е Рыцарьпе Фараон хêрê», Денис Гордеевâн «Хêвел ури», Владимир Кузьминâн «Юрату сукмакêсем» алçырâвêсем пур сунтâхра. Çавâн пекех «Чâваш халâх сâмахлâхê» ярâма тâсакан «Чâвашсен туй юррисем», «Ыр-хаяр халапêсем» кêнекесем те пур. Ольга Васильеван «Чâваш Енри управ вырâнсем» кêнеки те ярâм тâсâмê, вâл кêнеке çеç мар, унта сêтелçи вâйâ та пур, тêрлê хâнâхтару-ыйту та. Пур-ха, пур палâртса хунисем...
- Тавах тêплê калаçушâн.
- «Республика» хаçата юратса вулакансем эпир кâларакан кêнекесене те юратса вуласса шанатпâр.
Владислав НИКОЛАЕВ
